दाङ १० वैशाख ।  शिक्षकहरूले राजधानीकेन्द्रित आन्दोलनलाई तीव्र बनाए पनि दाङका सामुदायिक विद्यालयहरूमा विद्यार्थी भर्ना अभियान तीव्र गतिमा सञ्चालन भइरहेको छ ।

विद्यालयका निजी स्रोतका कर्मचारी र शिक्षकहरूले सक्रियतापूर्वक भर्ना कार्य गरिरहेका छन् । निजी स्रोतका कर्मचारी र शिक्षकहरूले विद्यालयबाट सङ्कलित शुल्कबाट तलब प्राप्त गर्ने भएकाले राजधानीमा जारी शिक्षक आन्दोलनले भर्ना अभियानमा खासै प्रभाव पारेको छैन ।

माध्यमिक विद्यालय रझेना, घोराहीमा वैशाख १० गतेसम्म पुराना एक हजार विद्यार्थीहरूले भर्ना गरिसकेका छन् भने करिब एक सय जना नयाँ विद्यार्थीले पनि भर्ना गरेको विद्यालय स्रोतले जनाएको छ । यस विद्यालयमा यसअघि १ हजार ८ सय विद्यार्थी अध्ययनरत थिए । वैशाख १४ गतेसम्म भर्ना अभियान सम्पन्न गरी कक्षा सञ्चालनको तयारी भइरहेको छ ।

राप्ती अञ्चलको सबैभन्दा पुरानो र ठूलो सामुदायिक विद्यालय, पद्मोदय पब्लिक नमुना उच्च माध्यमिक विद्यालयमा हालसम्म २सय ५० जना नयाँ विद्यार्थी भर्ना भइसकेका छन् । पुराना विद्यार्थीहरू पनि धमाधम भर्ना भइरहेकाले यकिन तथ्याङ्क तयार नभएको विद्यालय स्रोतले बताएको छ ।

स्थायी, राहत र अनुदान कोटामा तलब पाउने शिक्षक तथा कर्मचारीहरू आन्दोलनमा सहभागी भए पनि निजी स्रोतका शिक्षक र कर्मचारीहरू भर्ना अभियानमा सक्रिय छन् ।

यसैबीच घोराही उपमहानगरपालिकाले विद्यार्थी भर्ना प्रक्रियाको अनुगमन सुरु गरेको छ । बुधबार उपमहानगरपालिकाकी उपमेयर हुमा डिसी, प्रवक्ता एवम् सामाजिक महाशाखा संयोजक राममणि पाण्डे, शिक्षा महाशाखा प्रमुख नारायण पौडेललगायतका कर्मचारीले विद्यालयहरूको अनुगमन गर्नुभएकाे थियाे । अनुगमनका क्रममा घोराहीका सामुदायिक विद्यालयहरूमा भर्ना अभियान सन्तोषजनक रूपमा सञ्चालन भइरहेको प्रवक्ता पाण्डेले बताउनुभयाे । उहाँले उपलब्ध शिक्षक र कर्मचारीलाई भर्ना अभियानलाई निरन्तरता दिई विद्यार्थीको भविष्यप्रति संवेदनशील हुन आग्रह गर्नुभयाे ।

उपमहानगरपालिकाले घोराहीका पद्मोदय, रझेना, सिद्ध रत्ननाथ मावि नारायणपुर, जनता मावि बुका र गङ्गा मावि रामपुरको अनुगमन गरेको थियो । अनुगमनमा भर्ना अभियान उत्साहजनक रूपमा सञ्चालित भएको पाइएको पाण्डेले बताउनुभयाे । उहाँले भन्नुभयाे, “म सम्पूर्ण अभिभावक र विद्यार्थी भाइबहिनीहरूलाई समयमै विद्यालय गएर भर्ना गर्न हार्दिक अनुरोध गर्दछु । शिक्षा जस्तो संवेदनशील क्षेत्रमा हाम्रा सन्तानको भविष्यलाई अन्धकार बनाउनुहुँदैन ।”

घोराही उपमहानगरपालिकाका मेयर नरूलाल चौधरीले सबै सामुदायिक विद्यालयलाई तत्काल भर्ना प्रक्रिया सम्पन्न गरी पठनपाठन सञ्चालन गर्न निर्देशन दिएको जानकारी दिनुभयाे । उहाँले उपमहानगरपालिकाले सबै सामुदायिक विद्यालयमा अनुगमन गरी भर्ना अभियानलाई प्रभावकारी बनाउन कार्य गरिरहेको बताउनुभयाे । “हामीले सबै विद्यालय र व्यवस्थापन समितिलाई भर्ना अभियानलाई सक्रियतापूर्वक सञ्चालन गर्न निर्देशन दिएका छौँ,” उहाँले भन्नुभयाे । साभार चेतना अनलाइन