दंगीशरण, १० असार  - दाङको दंगीशरण गाउँपालिकाले आगामी आर्थिक वर्ष २०८२/८३ का लागि ४५ करोड ११ लाख ४१ हजार रुपैयाँको बजेट सार्वजनिक गरेको छ।

गाउँसभाको दोस्रो बैठकमा उपाध्यक्ष पिमा वली खड्काले मंगलबार बजेट प्रस्तुत गर्दै शिक्षा, स्वास्थ्य, कृषि, पूर्वाधार र सेवा प्रवाहमा प्राथमिकता दिइएको जानकारी दिनुभयो।

संघीय सरकारबाट झण्डै ३७ करोड ८२ लाख र प्रदेश सरकारबाट ३ करोड ९ लाख रुपैयाँ अनुदान प्राप्त हुने अनुमान गरिएको छ। यस्तै, आन्तरिक स्रोतबाट १ करोड ५५ लाख र बचतबाट २ करोड ६३ लाख रुपैयाँ समेटिएको छ।

बजेटमा ६१% चालु खर्च र ३८.३९% पुँजीगत खर्च रहनेछ। गाउँपालिकाले यस वर्ष शिक्षा, सिँचाइ, सडक, स्वास्थ्य र स्थानीय उत्पादन प्रवर्द्धनमा विशेष जोड दिएको बताइएको छ।

बैठकमा उपाध्यक्ष वलीले आर्थिक ऐन २०८२, बिनियोजन ऐन, र मटवा प्रणालीसम्बन्धी विधेयक पनि प्रस्तुत गर्नुभएको छ।
अध्यक्ष शम्भु गिरीले यसअघि १९५ बुँदामा आधारित नीति तथा कार्यक्रम सार्वजनिक गर्नुभएको थियो। गाउँसभाको तेस्रो बैठक असार १२ गतेका लागि बोलाइएको छ।