शान्तिनगर, १४असार - दाङको शान्तिनगर गाउँपालिकामा नवप्रवेशी शिक्षकहरूको क्षमता अभिवृद्धिका लागि सञ्चालित शिक्षक मेन्टरिङ कार्यक्रम एक कार्यक्रमबीच विधिवत रूपमा सम्पन्न गरिएको छ। कार्यक्रमको सुरुवात फागुन ४ गतेदेखि गरिएको थियो।

समापन कार्यक्रम गाउँपालिका अध्यक्ष प्रमोद बस्नेतको अध्यक्षतामा सम्पन्न भयो भने उपाध्यक्ष प्रेमा के.सी. को विशेष उपस्थिति रहेको थियो। कार्यक्रममा वडा अध्यक्षहरू, पालिका कर्मचारी, शिक्षक मेन्टर र मेन्टीहरूको सक्रिय सहभागिता रहेको थियो।

समापन अवसरमा सहभागी नवप्रवेशी शिक्षकहरूले मेन्टरिङ अवधिमा प्राप्त अनुभवहरू आदान–प्रदान गरे। कार्यक्रमकै अवसरमा प्रमाणपत्र वितरण समेत गरिएको थियो।

शिक्षकहरूको पेशागत दक्षता विकास, व्यवहारिक ज्ञान सुदृढीकरण र विद्यालयमा गुणस्तरीय शिक्षा प्रवर्द्धन गर्ने उद्देश्यका साथ कार्यक्रम सञ्चालन गरिएको हो। सहभागीहरूको अनुसार कार्यक्रमले उनीहरूलाई शिक्षण पेशामा अझ जिम्मेवार, सक्षम र आत्मविश्वासी बनाएको छ।

कार्यक्रमको अन्त्यमा गाउँपालिका अध्यक्ष प्रमोद बस्नेत र उपाध्यक्ष प्रेमा के.सी. ले सम्पूर्ण नवप्रवेशी शिक्षकहरूलाई उज्ज्वल शैक्षिक भविष्यको शुभकामना व्यक्त गर्दै, सिकेको ज्ञानलाई व्यवहारमा उतार्न प्रेरित गर्नुभयो।