दाङ,२६साउन - दाङको तुलसीपुर स्थित जलस्रोत तथा सिंचाई विकास डिभिजन कार्यालय दाङले २६९ योजना सम्पन्न गरेको छ । आर्थिक वर्ष २०८१/०८२ मा जम्मा २ सय ७१ योजना रहेकोमा २ सय ६९ योजना पूरा गरेको हो । कार्यालयले बुधबार पत्रकार सम्मेलन गरि २ वटा योजना बाहेक सबै योजना पूरा गरेको जानकारी दिएको छ । पुँजिगत बजेट ३२ करोड ७३ लाख  रहेकोमा ३१ करोड ८३ लाख ५६ हजार रुपैँया खर्च भएको कार्यालय प्रमुख कृष्ण बहादुर विकले बताए । जुन ९७.२७ प्रतिशत रहेको छ ।

उनका अनुसार जल उत्पन्न प्रकोप न्यूनिकरण तथा व्यवस्थापन कार्यक्रम ८७ वटा, सिंचाई आयोजना मर्मत सुधार तथा विस्तार कार्यक्रम एकसय ४५, मझौला तथा वैकल्पिक प्रविधिमा आधारित सघन सिंचाई कार्यक्रम ३२ वटा र जलासय निर्माणका ५ वटा योजना पूरा भएका हुन् । सिंचाई आयोजना मर्मत सुधार तथा विस्तारका दुई वटा योजना भने कार्यान्वयनमा हुन नसकेको उहाँको भनाई थियो । उनका अनुसार हाल कार्यालयबाट तीन वटा बहुबर्षिय योजनाको काम चलिरहेको छ । झिग्नी बबई सिंचाई योजना घोराही ३ र घारिचौर सिंचाई योजना बंगलाचुली ७ को ठेक्का सम्झौता भइसकेको छ, भने बस्तिखोला सिंचाई योजना शान्तिनर ३ र ४ को काम बोलपत्र आह्वान भएको छ ।

कार्यालयले २०७२ देखि अहिलेसम्म १ सय ६२ किलोमिटर नहर पक्की बनाएको छ, भने ६७ वटा लिट सिंचाई, ६७ वटा पम्प हाउस, ९.७३ किलोमिटर पाइप लाइनिङ, ४५ वटा विद्युतिकरण गरेको छ । जसबाट थप ७ हजार ६ सय ३२ हेक्टरमा सिंचाई सुविधा पुगेको छ, भने ३१ हजार ५ सय ८३ हेक्टरमा सिंचाई सुविधा सुदृढिकरण गरेको छ ।

त्यस्तैगरी त्यसयता ७२.७७ किलोमिटर तटबन्ध तथा नदी नियन्त्रणको काम भएको छ । जसबाट १२ हजार ५ सय ४६ हेक्टर जमिन सुरक्षित भएको छ, भने ८ हजार ६ सय ५८ वटा घर सुरक्षित भएका छन् । कार्यालय प्रमुख विकका अनुसार दाङमा ७५ हजार ९ सय ९१ हेक्टर(२५.७२ प्रतिशत) कृषि क्षेत्र हो । जस मध्ये अहिले ६० हजार ३ सय ६७ हेक्टर(२०.४३प्रतिशत) मा सिंचाई सुविधा पुगेको छ ।

उनले चालु आर्थिक वर्षमा पनि ३२ करोड ५६ लाख बजेट कार्यालयमा आएको छ । कार्यालयले माग गरे अनुसार अझै पनि बजेट नआउँदा प्रभावितहरुका माग सम्बोधन गर्न नसकिएको उनको भनाई छ । चालु वर्षकालागि पनि ५४ करोडको बजेट कार्यालयले पठाएको भएपनि ३२ करोड मात्रै बजेट आउने गरेको छ । साभार लाइभदाङ