काठमाडौं, १ मंसिर - सरकारी सेवा प्रवेश तयारी कक्षा संचालन गर्ने उद्देश्यले थ्री एस एजुकेसन नेटवर्कको औपचारिक सुरुवात गरिएको छ । आइतबार नयाँ बानेश्वरस्थित कार्यालयमा विशेष कार्यक्रममार्फत संस्थाको गतिविधि प्रारम्भ गरिएको हो ।

संस्थाको सुरुको दिनमा भर्ना हुने विद्यार्थीलाई ५० प्रतिशत छुट प्रदान गरिने जानकारी कार्यक्रम संयोजक मन्जु भट्टले दिइन् ।
संस्थाले प्रारम्भिक चरणमा निजामती सेवाअन्तर्गत शाखा अधिकृत, नायब सुब्बा, खरिदार, विद्यालय निरीक्षक, प्राविधिक सहायक तथा नेपाल प्रहरीअन्तर्गत प्रहरी निरीक्षक र सहायक निरीक्षकका लागि तयारी कक्षा संचालन गर्नेछ । त्यस्तै, शिक्षक सेवा आयोगअन्तर्गत माध्यमिक र आधारभूत तहका कक्षा पनि सञ्चालन हुने बताइएको छ।

निकट भविष्यमा एकै स्थानबाट सरकारी सेवाका सबै तयारी कक्षा उपलब्ध गराइने भट्टले बताइन् ।
विद्यार्थीको विश्वास र गुणस्तरलाई प्राथमिकतामा राख्दै कक्षा सञ्चालन गरिने संस्थाका व्यवस्थापक तथा प्रशिक्षक सन्तोष खड्काले बताए । उनका अनुसार हाललाई कक्षाहरू अनलाइन माध्यमबाट सञ्चालन हुनेछ भने छिट्टै भौतिक कक्षा समेत सुरु गरिनेछ ।

अनलाइन कक्षाहरू संस्थाकै मोबाइल एप र वेब साइटमार्फत उपलब्ध हुने जानकारी खड्काले दिए । हाल अनलाइन कक्षा सञ्चालन भए पनि परीक्षा भने भौतिक रूपमा दिने व्यवस्था मिलाइएको संस्थाले जनाएको छ ।