घोराही, ८ मंसिर - घोराही उपमहानगरपालिका -७ मा रहेको उत्तरबाहिनी क्षेत्रमा श्रीमद्भागवत सप्ताह ज्ञान महायज्ञ एवं धनधान्यचल - २०८२  तयारी पूरा भएको   छ । उत्तरबाहिनीस्थित श्री माता पवित्रादेवी साङ्गवेद संस्कृत माध्यामिक विद्यालयमा  भोलिदेखि सुरु हुने महायज्ञ तयारी पूरा भएको  हो । महायज्ञ मूल आयोजक समितिले सोमबार उत्तरबाहिनी क्षेत्रमै पत्रकार सम्मेलन गरी महायज्ञ सञ्चालनको तयारी पूरा भएको बारेमा जानकारी गराएको थियो । 

महायज्ञको मूल आयोजक समितिका संयोजक घोराही उपमहानगरपालिका -७ का वडाध्याक्ष खोपीराम चौधरीको अध्यक्षतामा भएको पत्रकार सम्मेलनमा नेपाल पत्रकार महासंघ दाङ शाखाका अध्यक्ष सन्तोष सुवेदी उत्तरबाहिनीमा हुन लागेको महायज्ञले गुरुकुल र यस समुदायबीच समन्वय र सम्पर्कको बिन्दु कायम गर्ने बताउनुभयो । उहाँले यो महायज्ञले उत्तरबाहिनी क्षेत्रको प्रचारप्रसारको जानकारी दिने र दिनुपर्नेमा जोड दिनुभयो  । महायज्ञले मानिसहरूको भेटघाट, धार्मिक र पर्यटनमात्र नभए यहाँको इतिहासको महत्त्वलाई दर्शाउने उहाँले बताउनुभयो । महायज्ञबाट संकलन भएको आर्थिकलाई व्यवस्थित रुपमा सञ्चालन हुने/नहुने भन्ने विषयमा थुप्रै प्रश्न उठ्ने हुँदा त्यसतर्फ आयोजक टिमले विषेश ध्यान दिनुपर्ने समेत उहाँको भनाइ थियोे । 

मूल आयोजक समितिका संयोजक खोपीराम चौधरीले पत्रकार सम्मेलनमार्फत  उत्तरबाहिनीमा  ज्ञान महायज्ञ सञ्चालन सबै तयारी पूरा भएको जानकारी दिनुभयो थियो । उहाँले  यही मंसिर नौ गतेदेखि  १६ गतेसम्म सञ्चालन रहने महायज्ञको उद्घाटन हुन भन्दा अगाडि विभिन्न ठाउँबाट कलश यात्रा निकालिने  बताउनुभयो । उत्तरबाहिनीको धार्मिक महत्त्वलाई चिनाउने र यसको प्रवर्द्धन गर्ने उद्देश्यले ज्ञान महायज्ञको आयोजना गरिएको उहाँले बताउनुभयो । 

पहिले उत्तरबाहिनीमा विभिन्न प्रकारका धार्मिक क्रियाकलापहरु सञ्चालन हुने गरेको र स्थानीयहरु नियम रुपमा पूजापाठ गर्दै आएको परम्परा रहेको संयोजक चौधरीले जानकारी दिनुभयो । उत्तरबाहिनीमा हिजो दिनमा स्कूल नभएतापनि त्यो आश्रममा संस्कृत पढ्ने विद्यार्थीहरुलाई बटुकको रुपमा राख्ने चलन रहेको र त्यहाँ संस्कृत पढाइ हुने गरेको उहाँले  बताउनुभयो । पछिल्लो समय २०४५/०४६ मा  नेपाल सरकारबाट मान्यता प्राप्त भएर त्यहाँ विद्यालय स्थापना भएपश्चात्  नियमित रुपमा संस्कृत पठनपाठन सुरु उहाँको भनाइ थियो ।  

त्यस्तै  महायज्ञ मूल समितिका सदस्य सचिव प्रकाश भट्टराईले  महायज्ञको तयारी पूरा भएको जानकारी दिँदै दाङको इतिहासमा पहिलोपटक संस्कृत गुरुकुल वेद विद्यालयलाई प्रवर्द्धन उद्देश्य राखेर उत्तरबाहिनी सुक्रवारमा श्रीमद्भागवत  महायज्ञको आयोजना गरेको बताउनुभयो  । उहाँले महायज्ञ मंसिर नौ गतेदेखि १६ गतेसम्म सञ्चालन हुने र महायज्ञलाई सफल बनाउन पटक-पटक भेला र छलफलले महायज्ञको मूल आयोजक समिति र २८ वटा उप-समिति बनाएर आ-आफ्ना कामहरू अगाडि बढाएको समेत बताउनुभयो । 

विशेष गरेर यो उत्तरबाहिनीको क्षेत्रको महत्त्वलाई उजागर गर्ने र त्यो उत्तरबाहिनीको महिमा, महत्त्व र गरिमालाई महायज्ञबाटै सबैसमक्ष सन्देश पुर्‍याउने  महायज्ञ प्रमुख उद्देश्य भएको कुरामा उहाँले जोड दिनुभयो । 

कार्यक्रमको सञ्चालन समितिका प्रचारप्रसार उपसमितिका संयोजक निशानदाजु भट्टराईले गर्नुभएको थियो ।