दंगीशरण,९ मंसिर - दंगीशरण गाउँपालिका महिला, बालबालिका तथा सामाजिक विकास शाखाको आयोजनामा “प्रविधिको सही प्रयोग गरौँ, लैङ्गिक हिंसा अन्त्य गरौँ” भन्ने मूल नाराका साथ १६ दिने लैङ्गिक हिंसा विरुद्धको अभियान भव्य रुपमा सुरु गरिएको छ।

मङ्गलवार नोभेम्बर २५ देखि औपचारिक रुपमा थालिएको अभियानको उद्घाटन कार्यक्रम गाउँपालिका उपाध्यक्ष पिमा वलि खड्काको अध्यक्षता र गाउँपालिका अध्यक्ष शम्भु गिरीको प्रमुख आतिथ्यतामा सम्पन्न भएको हो। उद्घाटन समारोहमा जनप्रतिनिधि, कर्मचारी, महिला अधिकारकर्मी तथा स्थानीय सरोकारवाला व्यक्तिहरुको सक्रिय उपस्थिति रहेको थियो।

कार्यक्रमको पहिलो दिन वडा अध्यक्ष, वडा सदस्य, कर्मचारी तथा महिला समूहको सहभागितामा हेकुलि चोकसम्म प्लेकार्ड र प्ले–ब्यानर सहित र्याली निकालिएको थियो। र्यालीमा “बालबालिकामा लगानी: सुनिश्चित भविष्यको थालनी”, “घर शान्ति, विश्व शान्तिको आधार”, “२० वर्ष पुगेपछि विवाह गर्ने सल्लाह छ”, “लैङ्गिक हिंसा अन्त्य गरौँ, सभ्य समाज निर्माण गरौँ”, “सवैको घरमा शान्ति–समृद्धि, देशमा आर्थिक उन्नति” जस्ता संदेशसहितका नारा प्रदर्शन गरिएको थियो। र्याली हेकुलि चोकमा पुगेपछि कोणसभामा परिणत भएको थियो।

गाउँपालिका उपाध्यक्ष पिमा वलि खड्काका अनुसार १६ दिनसम्म चल्ने यस अभियानका प्रत्येक दिन फरक विषयमा आधारित सचेतना कार्यक्रम, अन्तर्क्रिया, अधिकार अभिमुखीकरण, विद्यालय तथा समुदायस्तरका भेटघाट, प्रविधि उपयोगमा आधारित सचेतना तालिम लगायतका गतिविधिहरु सञ्चालन गरिनेछ। उनले लैङ्गिक हिंसा समाप्तिका लागि स्थानीय तह, समुदाय र परिवारको सक्रिय सहभागिता अनिवार्य रहेको बताइन्।

अभियानले समाजमा विद्यमान लैङ्गिक भेदभाव, हिंसा तथा दुराचारको अन्त्य गर्दै समानता, सम्मान र सुरक्षित वातावरण निर्माणमा महत्वपूर्ण योगदान पुर्याउने विश्वास आयोजक संस्थाले व्यक्त गरेको छ।