दाङ,१२ मंसिर - अम्बिका माध्यमिक विद्यालय हर्नाेक दाङले लोपउन्मुख परम्परागत सीप अन्तरगत सालको पातको दुना टपरी बुन्ने सीप सिकाएको छ । पछिल्लो समयमा दुना र टपरी प्रयोग गर्ने र बनाउन तरिका भुल्दै जान थालेपछि विद्यालयमा अध्ययनरत छात्र र छात्रालाई सो सीप सिकाइएको हो । 

विद्यालयमा अध्ययरत विद्यार्थीलाई सालको पात टिप्न लगाइ सामुहिक रुपमा दूना र टपरी बनाउन सिकाइएको हो । समाजमा आधुनिकताका नाममा प्लास्टिकका प्लेट गिलास तथा अन्य सामग्री प्रयोग बढ्दै गैरहेको समयमा दुना टपरी बनाउने सीपले आफूहरुलाई निकै फाइदा पुगेको विद्यार्थीहरुले बताएका छन् ।

विद्यालयको बार्षिक शैक्षिक क्यालेण्डर अनुसार शुकवार दुना टपरी बनाउने सीप सिकाइएको विद्यालयका प्रधानाध्यापक सन्त बहादुर पुनले जानकारी दिनुभयो । किताबी ज्ञान मात्रै नभएर विद्यार्थीलाई व्यवहारिक ज्ञान समेत दिलाउने उदेश्यले जंगलमा सजिले पाइने र छिट्टै सिक्न सक्ने सीप दुना टपरी बनाउन सिकाइएको उहाँको भनाइ छ । दुना टपरी बनाउन विद्यालयका छात्रा मात्र नभएर छात्र समेत उत्सुकताका साथ सहभागी भएका थिए ।

I