मसुरिया, १४ मंसिर - दाङको राप्ती गाउँपालिकामा केही दिनदेखि उत्पन्न सरसफाइ सम्बन्धी समस्या समाधानका लागि आइतबार पहिलो चरणको वार्ता सम्पन्न भएको छ।

गाउँपालिकाको कार्यालय मसुरियामा बसेको वार्तामा स्थानीयको मागअनुसार सरसफाइ केन्द्रलाई थप व्यवस्थित र प्रभावकारी रूपमा सञ्चालन गर्ने विषयमा सकारात्मक छलफल भएको गाउँपालिकाका अध्यक्ष प्रकाश विष्टले जानकारी दिनुभयो। स्थानीय बासिन्दाले उठाएका सरसफाइ व्यवस्थापनसम्बन्धी गुनासो र सुधारका उपायबारे विस्तृत छलफल भएको थियो।

वार्तामा गाउँपालिकाका अध्यक्ष प्रकाश विष्ट, विभिन्न वडाका अध्यक्षहरू,ईलाका प्रहरी कार्यालय भालुबाङका कार्यालय प्रमुख प्रहरी निरीक्षक पुष्कर सिंह एरी, सरोकारवाला तथा कठाहा गाउँ प्रधान अशोक चौधरी नेतृत्वको वार्ता टोलीकाे सहभागिता रहेको थियो।

पहिलो चरणको वार्ता केही महत्वपूर्ण बुँदामा सहमति नजिक पुगे पनि बाँकी विषयमा थप छलफल आवश्यक देखिएकोले दाेस्राे चरणको वार्ता भोलि पुनः बस्ने गरी स्थगित गरिएको हाे।

स्थानीयको माग सम्बोधन गर्दै सरसफाइ व्यवस्थापनलाई दीगो, व्यवस्थित र प्रभावकारी बनाउनेतर्फ गाउँपालिका गम्भीर र सकारात्मक रूपमा लागि रहेको अध्यक्ष विष्टको भनाइ रहेको छ।