कान्सास सिटी - विश्व फुटबलमा नयाँ पुस्ताका स्टार खेलाडीहरूले आफ्नो प्रभुत्व स्थापित गर्न खोजिरहेका बेला अर्जेन्टिनाका महान् खेलाडी लियोनल मेस्सीले विश्वकप मञ्चमा अझै पनि आफू नै सबैभन्दा ठूलो नाम रहेको सन्देश दिएका छन्।

फ्रान्सका स्टार फरवार्ड किलियन एमबाप्पेले विश्वकप इतिहासमा मेस्सीलाई पछि पार्दै गोल संख्या बढाएका थिए भने नर्वेका एर्लिङ हालाण्डले इराकविरुद्ध दुई गोल गर्दै विश्वकपमा प्रभावशाली उपस्थिति जनाएका थिए। यसले विश्व फुटबलमा नेतृत्व पुस्तान्तरणको संकेत देखिएको थियो।

तर दिनको अन्त्यसम्ममा मेस्सीले सबै चर्चा आफ्नो पक्षमा ताने। उनले आफ्नो विश्वकप करियरकै पहिलो ह्याट्रिक पूरा गर्दै विश्वकप इतिहासका सर्वाधिक गोलकर्तामध्ये एक जर्मनीका मिरोस्लाभ क्लोजेसँग बराबरी गरे। मेस्सीको विश्वकप करियरमा अब १६ गोल पुगेका छन्।

आगामी साता ३९ वर्ष पुग्न लागेका मेस्सी विश्वकपमा अर्जेन्टिनाका सबैभन्दा कम उमेरका र सबैभन्दा बढी उमेरका गोलकर्ता बन्ने दुर्लभ कीर्तिमानसमेत कायम गर्न सफल भएका छन्।

अमेरिकाको एरोहेड स्टेडियममा खेल हेर्न पुगेका हजारौं समर्थकले मेस्सीलाई नजिकबाट हेर्न लामो समय ट्राफिकमा बिताएका थिए। खेलको ७९औँ मिनेटमा मेस्सी मैदानबाट बाहिरिँदा सम्पूर्ण दर्शकदीर्घा उभिएर उनको सम्मानमा ताली बजाएको थियो।

खेल सुरु भएको मात्र छ मिनेटमै मेस्सीले बल जाली चुमाएका थिए। लाउटारो मार्टिनेजको उत्कृष्ट पासमा गोल गरे पनि अफसाइडका कारण त्यो गोल मान्य भएन। यदि त्यो गोल गणना भएको भए मेस्सी विश्वकप इतिहासका एकल सर्वाधिक गोलकर्ता बन्ने थिए।

तर त्यसपछि उनले गोलका लागि धेरै समय कुर्नुपरेन। खेलको सुरुआती चरणमै आएको अर्को अवसरमा मेस्सीले आफ्नो उत्कृष्ट क्षमता प्रदर्शन गरे। मिडफिल्डबाट आएको पास नियन्त्रण गर्दै उनी पेनाल्टी क्षेत्रतर्फ अघि बढे। पाँच जना अल्जेरियाली रक्षकले घेरेको अवस्थामा उनले बायाँ खुट्टाबाट शक्तिशाली प्रहार गरे।

करिब २० यार्ड टाढाबाट गरिएको त्यो शानदार प्रहार गोलरक्षक लुका जिदानको औँलाले छोए पनि जाली चुम्न सफल भयो। उक्त गोल प्रतियोगिताकै उत्कृष्ट गोलमध्ये एकका रूपमा स्मरणीय बन्ने अपेक्षा गरिएको छ।

विश्व फुटबलमा नयाँ पुस्ताका खेलाडीहरूको उदय भइरहे पनि मेस्सीले आफ्नो प्रदर्शनमार्फत स्पष्ट सन्देश दिएका छन्—विश्वकपको सबैभन्दा ठूलो मञ्चमा उनी अझै पनि ‘द म्यान’ अर्थात् सबैभन्दा प्रभावशाली खेलाडी हुन्। साभार : सिएनएनबाट