काठमाडाै‌, १६ भदौ - प्रधानमन्त्री दैवी प्रकोप उद्धार कोषमा सहयोग गरेको भन्दै नक्कली भौचर तथा स्टेटमेन्ट सामाजिक सञ्जालमा राख्ने एक जना पक्राउ परेका छन् ।

पक्राउ पर्नेमा रामेछापको गोकुलगङ्गा गाउँपालिका–२ ठोसेका ३२ वर्षीय भगवान कार्की रहेका छन् । उनलाई जिल्ला प्रहरी कार्यालय रामेछापले पक्राउ गरेको हो ।

प्रहरीका अनुसार कार्कीले प्रधानमन्त्री दैवी प्रकोप उद्धार कोषमा १ लाख २० हजार रुपैयाँ सहयोग गरेको देखाउने नक्कली स्टेटमेन्ट च्याटजीपीटीको प्रयोग गरी तयार पारेका थिए । उक्त नक्कली स्टेटमेन्ट सामाजिक सञ्जालमा राखेर आफूले राहत कोषमा सहयोग गरेको दाबी गरेको प्रहरीको भनाइ छ ।

त्यसैगरी, कार्कीले कोषमा सहयोग गरेको भन्दै आफ्नै क्यूआर कोडसमेत सामाजिक सञ्जालमा सार्वजनिक गरेको र उक्त क्यूआर कोडमार्फत रकम संकलन गरी ठगी गरेको प्रारम्भिक अनुसन्धानबाट खुलेको प्रहरीले जनाएको छ ।

घटनाबारे थप अनुसन्धान भइरहेको जिल्ला प्रहरी कार्यालय रामेछापका प्रहरी निरीक्षक कमल राउतले जानकारी दिनुभयो ।

प्रहरीले सामाजिक सञ्जालमा राहत, सहयोग तथा विपद्का नाममा सार्वजनिक हुने भौचर, बैंक स्टेटमेन्ट र क्यूआर कोडको सत्यता जाँच गरेर मात्र रकम पठाउन सर्वसाधारणलाई आग्रह गरेको छ।