दाङ - दाङको घोराहीमा जारी मुख्यमन्त्री कप प्रदेश स्तरीय महिला भलिबल प्रतियोगितामा क्वाटरफाईनल खेल्ने सात टीमको टुंगो लागेको छ । प्रदेश खेलकुद परिषद, लुम्बिनीको आयोजनामा बुधबारदेखि शुरु भएको प्रदेश स्तरीय प्रतियोगिता अन्तरगत बिहीबार भएका लिग चरणको खेलबाट क्वाटरफाईनल खेल्ने सात टीमको टुंगो लागेको हो । लिग चरणको अन्तिम खेलमा दाङ र बर्दिया बीचको खेल कमजोर भिजिबिलिटीका कारण रोकिएपछि क्वाटरफाईनल समीकरण पूरा हुन नसके पनि अन्य सात टीमले क्वाटरफाईनलमा स्थान सुरक्षित गरेका छन् ।
घोराही उपमहानगरपालिका वडा नम्बर १५ स्थित जिल्ला समन्वय समितिको सहिद मञ्चमा जारी प्रतियोगितामा क्वाटरफाईनलमा रोल्पा, रुकुमपूर्व, पाल्पा, अर्घाखाँची, बाँके, कपिलबस्तु र रुपन्देही प्रवेश गरेका छन् ।

दाङ र बर्दिया भने लिग चरणको अन्तिम खेलमा १–१ को बराबरीमा रोकिएका छन् । अब यी दुई टीम बीचको खेल शुक्रबार बिहान फेरि शुरुबाट हुने आयोजकले जनाएको छ । दुवै टीमलाई क्वाटरफाईनल प्रवेश गर्न जीत अनिवार्य छ ।

समुह ‘डी’ मा रहेका रुपन्देही, दाङ र बर्दिया मध्ये रुपन्देही समुह विजेता हुँदै अन्तिम आठमा स्थान सुरक्षित गर्दा अब दुई मध्ये एक टीम उपविजेता हुँदै क्वाटरफाईनल पुग्नेछ ।
समुह ‘ए’ बाट रोल्पा विजेता र रुकुमपूर्व उपविजेता हुँदै क्वाटरफाईनल प्रवेश गरेका छन् । समुह ‘बी’ बाट पाल्पा बुधबार नै क्वाटरफाईनल प्रवेश गर्दा अर्घाखाँची उपविजेता हुँदै अन्तिम आठमा पुगेको छ । समुह ‘सी’ बाट बाँके विजेता र कपिलबस्तु उपविजेता हुँदै अन्तिम आठमा पुगेका छन् । समुह ‘डी’ बाट रुपन्देही विजेता हुँदै अन्तिम आठमा पुग्दा उपविजेताको टुंगो शुक्रबार हुने लिग चरणको अन्तिम खेलबाट लाग्ने आयोजनकले जानकारी दिएकाे छ ।

यसअघि, लिग चरणको खेलमा कपिलवस्तुले प्युठानलाई ३–२ को सेटमा हराउँदा, रुपन्देहीले बर्दियालाई ३–१ को सेटमा हरायो । यसैगरी, रोल्पाले गुल्मीलाई ३–० को सोझो सेटमा हराउँदा अर्घाखाँचीले पनि नवलपरासीलाई ३–० को सोझो सेटमा पराजित गरेको छ । बाँकेले पनि कपिलवस्तुलाई ३–० को सोझो सेटमा पराजित गरेको छ । प्रतियोगितामा लिग चरणबाट अहिलेसम्म गुल्मी, नवलपरासी र प्युठान बाहिरिएका छन् ।

लिगकम नकआउटको आधारमा खेलाइएको मुख्यमन्त्री कप प्रदेशस्तरीय महिला भलिबल प्रतियोगितामा प्रदेशका १२ वटै जिल्लाबाट महिला भलिबल खेलाडी दाङमा आएका प्रदेश खेलकुद परिषदका सदस्य सचिव तिरन गौतमले जानकारी दिनुभयो । प्रदेशमा दक्ष महिला खेलाडी उत्पादन गर्न र भलिबलको विकासका लागि प्रदेश स्तरीय प्रतियोगिता आयोजना गरिएको प्रदेश खेलकुद परिषद, लुम्बिनीले जनाएको छ । प्रतियोगिताको क्वाटरफाईनल र सेमीफाईनलका खेल शुक्रबार हुनेछन् । फाईनल खेल शनिबार हुने आयोजक प्रदेश खेलकुद परिषद लुम्बिनीले जानकारी दिएकाे छ।

प्रतियोगिताको उपाधि जित्ने टीमले नगद एक लाख, मेडल, ट्रफी र प्रमाण–पत्र पुरस्कार पाउने छ भने उपविजेता टीमले नगद पैसट्टी हजार, मेडल, ट्रफी र प्रमाण–पत्र पुरस्कार पाउने आयोजक प्रदेश खेलकुद परिषदका सदस्य कैलाश रोका मगरले बताउनुभयो । यसैगरी, तृतीय पुरस्कार नगद पैतिस हजार, मेडल, ट्रफी र प्रमाण–पत्र र सान्त्वना हुने टीमले नगद पन्ध्र हजार प्रमाण–पत्र प्राप्त गर्ने उहाँले बताउनुभयो ।

प्रतियोगितामा सर्वोत्कृष्ट खेलाडीलाई नगद दश हजार, मेडल, ट्रफी र प्रमाण–पत्र प्रदान गरिनुका साथै ६ विधामा उत्कृष्ट हुने खेलाडीलाई पनि जनही पाँच हजार, मेडल, ट्रफी र प्रमाण–पत्र प्रदान गरिने भएको उहाँले बताउनुभयो ।