दाङ, १४ मंसिर - नेपाल कम्युनिस्ट पार्टी (माओवादी) का महासचिव नेत्र विक्रम चन्द `विप्लव´ले   सिद्धान्त, विचार र नीति छोडेर पार्टी एकता नहुने बताउनुभएको छ ।

पार्टी दाङले आइतबार तुलसीपुरमा आयोजना गरेको राजनीतिक तथा वैचारिक प्रशिक्षण कार्यक्रमलाई सम्बोधन गर्दै महासचिव विप्लवले माओवादीसँगको एकताको बारेमा स्पष्ट पार्दै  माओवादको सिद्धान्त, पार्टीको विचार र नीतिलाई छोडेर पार्टी एकता नहुने बताउनुभएको हो । 

पार्टी एकताबाट भगेको माओवादी केन्द्र हो, नेकपा होइन्, विप्लवले भन्नुभयो ।  पार्टी एकताका लागि सबैभन्दा पहिले नेकपाले निर्णय गरेको र माओवादीसँग पार्टी एकता गर्ने र कम्युनिस्टहरुसँग मोर्चा बनाएर अगाडि बढ्ने लगायतका निर्णय पार्टीको बैठकबाटै लिएको उहाँले बताउनुभयो ।  पार्टी एकता काम अझै नसिद्दिएको र  उहाँहरुले सिद्धान्त र विगतका गल्ती सच्याएर आएमा भोलिका दिनमा पनि एकता हुनसक्ने उहाँको भनाइ थियो । उहाँले  सबैलाई समेटेर अगाडि बढ्ने पार्टीको दृष्टिकोण भएको र पार्टीलाई एकतावद्द गरेर अगाडि बढ्नका लागि गलतलाई सच्याएर आए फेरि एकता असम्भव नहुने  धारणा राख्नुभएको थियो  ।

नेता विप्लवले पार्टीले नयाँ कम्युनिस्ट केन्द्र निर्माण गर्ने र नयाँ विचार लिएर अगाडि बढ्ने बताउनुभयो । बाह्य शक्तिहरूले  कम्युनिस्ट आन्दोलनको नामलाई मेटाउन खोजेको र त्यसको रक्षाको लागि कम्युनिस्ट आन्दोलनको बलियो ढोका खोलेर अगाडि बड्नुपर्ने उहाँको जोड थियो । पार्टीप्रति देशबहर जनताको आकर्षण बढ्दै गएको हुँदा नेताकार्यकर्ताहरुले पार्टीको अनुशासनमा रहेर काम गर्नुपर्ने र अझै जनतालाई पार्टीप्रति विश्वासिलो बनाउनुपर्ने उहाँले बताउनुभएको थियो । जनयुद्ध भनेको माओवाद र माओवादीसँग जोडिएको भएको हुँदा पार्टीले नेकपा पछाडी माओवादी जोडेको समेत उहाँको भनाइ थियो । 

सरकारले तोकेकै समयमा निर्वाचन हुने कुरा असम्भव भएको भएपनि   निर्वाचनका लागि पार्टी चुनावमा भिड्ने र त्यसका लागि निर्वाचन आयोगमा दल दर्ता गरेर पार्टीले  गुलावको फूलको चन्ह लिएको बताउनुभयो । पार्टीले  आफ्नै बलबुताले  आगामी निर्वाचन भाग लिने र त्यसका लागि पार्टीका नेताकार्यकर्ताहरु ढुक्क भएर जनताकोबीचमा जानुपर्ने उहाँले बताउनुभयो । देशभर राम्रा उम्मेदवारहरुलाई लिएर पार्टी चुनावमा लड्ने र संघर्ष गरेर अगाडि बढ्ने तर, आवश्यक परे चुनावी मोर्चा बनाएर भएपनि निर्वाचनमा भाग लिने उहाँको भनाइ छ । 

साथै, उहाँले जेनजीको नाममा बनेको सुशीला कार्कीको अन्तरिक सरकारलाई हटाएर सर्वपक्षीय सरकार बनाउनुपर्ने र त्यो  राजनीतिकसहित  सरकार हुनुपर्ने बताउनुभयो । 
राजनीतिसहितको सरकारले सबैभन्दा पहिले संविधानको पुनर्लेखन गर्नुपर्ने र  त्यसमा प्रत्यक्ष कार्यकारी राष्ट्रपति वा प्रधानमन्त्री हुनेगरी संविधानको पुनर्लेखन हुनुपर्ने उहाँले बताउनुभएको थियो । 

त्यस्तै पार्टीका पोलिटब्यू शीतल सीले देश आज भिन्नै प्रवृत्ति उभिरहेको कुरामा जेनजी बिद्रोहले नेपालको दलाल व्यवस्थाको जरा हल्लाइदिएको बताउनुभयो । जेनजी बिद्रोह आफ्नो पक्ष नभएपनि क्रान्तिको ढोका खोलिएको उहाँको धारणा थियो ।
जेनजी बिद्रोहबाट नेपालमा लामो समयदेखि शासन गर्दै आएका तीन ठूला पार्टीलाई  धुलो चटाइदिएको समेत उहाँको जोड रहेको थियो । चुनाव भनेको पार्टीको एउटा संघर्षको  मोर्चा भएको र पार्टीको आवश्यकता अनुसार  विभिन्न मोर्चाहरुको माध्यमबाट पार्टीलाई अगाडि बढाउने उहाँको भनाइ थियो । 

पार्टीका जिल्ला इञ्चार्ज सविन सीको अध्यक्षतामा भएको कार्यक्रममा पार्टीका केन्द्रीय स्कूलिङका प्रयास सी, पार्टीका केन्द्रीय सदस्यहरु प्रदीप सी, पाटन सी लगायत पार्टीका जिल्ला  नेताकार्यकर्ताहरु उपस्थिति रहेको थियो । कार्यक्रमको सञ्चालन जिल्ला सेक्रेटरी तिलक सीले  गर्नुभएको थियो ।

 प्रशिक्षण दिन दाङ आउनुभएका महासचिव विप्लवलाई जिल्ला पार्टीका नेताकार्यकर्ताहरुले गुलावको फूल दिएर भब्य रुपमा स्वागत गरेका थिए ।