काठमाडौ - नेपाली कांग्रेसले आगामी चैत मसान्तभित्र पार्टीको क्रियाशील सदस्यता नवीकरणको काम सम्पन्न गरिसक्ने भएको छ ।

क्रियाशील सदस्यता व्यवस्थापन समितिको शुक्रबार बैठकले बैठकले कार्यतालिका बनाएर चैत मसान्तभित्र क्रियाशील सदस्यता नवीकरणको काम सम्पन्न गरिसक्ने निर्णय गरेको हो ।

कांग्रेसले महामन्त्री गगन थापाको संयोजकत्वमा केन्द्रीय सदस्यहरू सीता गुरूङ, योगेन्द्र चौधरी र प्रकाश रसाइली (स्नेही) सदस्य रहने गरी क्रियाशील सदस्यता व्यवस्थापन समिति गठन गरेको छ ।

बैठकले तालिका बनाएरै चैत मसान्तभित्र क्रियाशील सदस्यता नवीकरणको काम सम्पन्न गर्ने निर्णय गरेको नेतृ गुरुङले जानकारी दिइन् ।

‘नवीकरणका लागि कार्यतालिका नै बनाएर पठाउँछौँ । वडाले कहिले सक्ने, पालिकाले, प्रदेशले प्रतिनिधिसभा क्षेत्रीय समिति, जिल्ला हुँदै केन्द्रमा कति गते आइपुग्ने भनेर कार्यतालिका नै आउँछ,’ उहाँले भनिन् ।

गुरुङले नयाँ क्रियाशील सदस्यता वितरणका लागि वैज्ञानिक प्रक्रिया अबलम्बन गर्न अध्ययन गरी आवश्यक निर्णय लिने निर्णय गरिएको पनि जानकारी दिइन् ।

‘नयाँ सदस्यता वितरणका लागि अध्ययन गर्छौं, जातीय, लैंगिक, भूगोल क्लस्टरअनुसार कस्तो छ त्यसको अध्ययन गरेर नयाँ मापदण्ड बनाउने निर्णय भएको छ,’ उहाँले भनिन् ।

क्रियाशील सदस्यता व्यवस्थापन समिति सदस्य रसायलीले डोल्पामा कार्यवाहक सभापतिमार्फत् क्रियाशील फारम र क्रियाशील सदस्यताको कार्ड पठाउने निर्णय पनि भएको जानकारी दिए । उनले समितिको अर्को बैठक पुस २६ गते फेरि बस्ने बताउनु भयो ।