काठमाडौँ - अन्तिम ओभरमा दीपेन्द्र सिंह ऐरी चम्किँदा नेपालले आईसीसी टीट्वान्टी विश्वकप एसिया र इस्ट एसिया छनोटको सुपर सिक्सको आफ्नो पहिलो खेलमा यूएईमाथि रोमाञ्चक जित निकालेको छ ।

आइतबार भएको खेलमा नेपाल यूएईमाथि एक रनले विजयी भएको हो ।

१४१ रनको लक्ष्य पछ्याएको यूएईले पूरा ओभर खेल्दै ९ विकेटको क्षतिमा मात्र १३९ रन बनाउन सक्यो ।

आइतबार साँझ भएको खेलमा यूएईका लागि अलिशान शराफुले ५८ रनको अर्धशतकीय पारी खेले पनि जित दिलाउन सकेनन्, ४० बल खेलेका उनले ३ चौका र ५ छक्का प्रहार गरे । त्यस्तै ध्रुव प्रशारले पनि ३२ रन बनाउँदा जोनाथन फिगी १९ रन बनाए ।

नेपालका लागि ऐरीले सर्वाधिक तीन विकेट लिए । त्यस्तै सोमपाल कामी, गुलशन झा र सन्दीप लामिछानेले एक-एक विकेट लिए ।

टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै १४० रन बनाएको थियो ।नेपालका लागि आसिफ शेखले ५१ रनको अर्धशतकीय पारी खेलेका थिए । ४७ बल खेलेका उनले ४ चौका र १ छक्का प्रहार गरे ।

त्यस्तै कुशल भुर्तेलले २८ रन बनाउँदा रोहित कुमार पौडेलले २० रनको योगदान गरे । नेपालका गुलशन झाले ४ बलमा १४ रन बनाए पाँचौँ बलमा आउट भए भने कुशल मल्लले मात्र १० रन बनाए ।

यूएईका लागि बलिङतर्फ जुनाइद सिद्धकी, मोहम्मद रोहिद, हाइदर अली, हर्सित कौसिक, जहिद अली र ध्रुव प्रशारले एक-एक विकेट लिए ।

आजको जितसँगै नेपालले सुपर सिक्समा २ खेलबाट ४ अंक जोडेको छ ।