कमिरचौर २५ कार्तिक - दाङको बंगलाचुली गाउँ पालिका वडा नम्बर ३ मा सञ्चालन भएको टोल स्तरीय क्रिकेट प्रतियोगिताको उपाधि श्रीवारी बि ले जितेको छ । महेन्द्र नमुना माध्यामिक विद्यालयको खेल मैदानमा सञ्चालन भएको खेलमा ६ विकेटले श्रीवारी ए लाई पराजित गर्दै उपाधि जित्न सफल भएको हो । 
विजेता हुन सफल श्रीवारी बि ले नगद रु १८ हजार सहित मेडल प्रमाणपत्र र ट्रफी हात पारेको छ भने उपविजेता हुन सफल श्रीवारी ए ले नगद रु १२ हजार सहित मेडल प्रमाणपत्र र ट्रफि हात पारेको छ । 

प्रतियोगिता अवधिमा उत्कृष्ट खेल प्रदर्शन गर्न सफल श्रीवारी बि का खुमान महरा म्यान अफ द सिरिज घोषित हुनुभएको छ । भने बेस्ट बलरमा श्रीवारी बबि का दिलिप बुढाथोकी र बेस्ट ब्याट्सम्यान श्रीवारी ए का कप्तान दिपक खत्री घोषित हुनुभएको हो । 

बंगलाचुली गाउँपालिका वडा नम्बर ३ का वडा अध्यक्ष शोभाराज विश्वकर्माको अध्यक्षता तथा बंगलाचुली गाउँपालिका अध्यक्ष तुल्सिराम पुनको प्रमुख आतिथ्यता तथा गाउँपालिका उपाध्यक्ष भक्त बहादुर जिसिको प्रमुख आतिथ्यतामा समापन कार्यक्रम सम्पन्न भएको हो । 

समापन कार्यक्रमलाई सम्बोधन गर्दै गाउँपालिका अध्यक्ष तुल्सिराम पुनले पछिल्लो समय युवाहरुमा लागुपदार्थको दुर्व्यसन बढिरहेको र खेलकुद गतिविधिले यसको नियन्त्रण गर्न मद्दत गर्ने बताउनुभयो ।यस्तै उहाँले समाजमा रहेका कु संस्कारहरुलाई सुधार गर्न युवाहरूको प्रमुख भुमिका हुनुपर्ने बताउनुभयो । साथै अध्यक्ष पुनले गाउँपालिकाले खेलकुद सँगै युवा लक्षित कार्यक्रमको लागि बजेट विनियोजन गरेको समेत बताउनुभयो । 

यस्तै कार्यक्रममा बोल्दै गाउँपालिका उपाध्यक्ष भक्त बहादुर जिसिले युवाहरूमा अनुशासनको विकास गर्न खेल क्षेत्रले प्रमुख भुमिका निभाउने बताउनुभयो । यस्तै उहाँले प्रत्येक वडामा सञ्चालन हुने खेलकुद गतिविधिले खेलाडी उत्पादन हुने बताउनुभयो । साथै उहाँले पछिल्लो समय गाउँपालिकामा क्रिकेट भलिबल जस्ता खेलकुद गितिविधिहरु सञ्चालन गरिरहेको समेत बताउनुभयो । 

यस्तै कार्यक्रमको समापन गर्दै वडा नम्बर ३ का अध्यक्ष शोभाराज विश्वकर्माले वडाले गर्ने विभिन्न कार्यक्रमको प्रतिक्रिया सभ्य भाषामा दिन आग्रह गर्नुभयो । उहाँले वडा भित्र खेलकुदमा युवाहरूको उत्साह बढिरहेको बताउनुभयो । 

प्रतियोगितामा ३ वटा टिमको सहभागिता रहेको थियो ।