एनपीएलमा सुदूरपश्चिम रोयल्सको लगातार दोस्रो जित, पोखरा एभेन्जर्स १८ रनले पराजित

शनिबार, मंसिर ६, २०८२

काठमाडौँ,६ मंसिर - सुदूरपश्चिम रोयल्सले नेपाल प्रिमियर लिग (एनपीएल) क्रिकेटमा आफ्नो बलियो दावेदारीता प्रस्तुत गरेको छ । ओपनरद्वय जोस ब्राउन र विनोद भण्डारीको शतकीय साझेदारीमा सुदूरपश्चिमले शुक्रबार पोखरा एभेन्जर्सलाई १८ रनले पराजित गरेको छ । 


गत वर्ष फाइनलमा पराजित सुदूरपश्चिम राेयल्सको यो लगातार दोस्रो जित हो । टोलीले पहिलो खेलमा काठमान्डु गोर्खाजलाई २९ रनले पराजित गरेको थियो । पोखरा पहिलो खेलमा विराटनगर किंग्ससँग ५३ रनले पराजित भएको थियो । गत वर्ष यी दुईबीचको खेलमा सुदूरपश्चिम ५ रनले विजयी भएको थियो ।

त्रिवि अन्तर्राष्ट्रिय क्रिकेट रंगशालामा टस हारेर ब्याटिङ निम्तो पाएको सुदूरपश्चिमले निर्धारित २० ओभरमा ४ विकेट गुमाई १ सय ९३ रन बनाएको थियो । जवाफमा कप्तान कुशल भुर्तेलले लगातार दोस्रो खेलमा अर्धशतक बनाए पनि पोखराले ८ विकेट गुमाई १ सय ७५ रनमात्र बनाउन सक्यो ।

भुर्तेलले ३२ बल खेलि समान ४ चौका र छक्कासहित ५३ रन बनाए । स्कट कुग्लेइनको बलमा क्रस गरेर खेल्न खोज्दा उनले लेग स्टम्प गुमाएका थिए । पोखराले पावर प्लेको ६ ओभरमा २५ रनमात्र जोड्दा ३ विकेट गुमाए पनि भुर्तेल र जिम्मी निसमले चौथो विकेटमा ४३ बलभित्र ७५ रन जोडेका थिए ।


गत सिजन जनकपुर बोल्ट्सलाई उपाधि दिलाएका निसमले २५ बल खेल्दै २ चौका र ५ छक्कासहित ४७ रन बनाए । उनलाई रोयल्सका कप्तान दीपेन्द्रले लो बलमा बोल्ड गरे । सुमित बर्मा ६ र अभिषेक तिवारी १३ बलमा ३ रन बनाई आउट भए ।

पोखराको सुरुआत राम्रो थिएन । पहिलो ओभरमै एडम रोसिङ्टन रनआउट भए । उनका ओपनिङ जोडी दिनेश खरेलले पनि ६ रनमात्र बनाउन सके । किरण ठगुन्ना पनि ९ रनमै आउट भए । तल्लोक्रममा ड्यान डाउथवेटले १६ बल खेल्दै १ चौका र ५ छक्कासहित ३७ रन बनाए । विपिन खत्री ७ रनमा अविजित रहे । रोयल्सका हरमित सिंहले ४ ओभरमा २२ रन खर्चेर २ तथा कुग्लेइन, दीपेन्द्र, हेमन्त धामी, अविनाश बोहरा र नरेन साउदले १–१ विकेट लिए ।

यसअघि ब्राउन र विनोदले पहिलो १० ओभरमै विनाक्षति ९९ रन जोडेर सुदूरपश्चिमलाई उत्कृष्ट सुरुआत दिलाएका थिए । ११ औं ओभरमा निसमले ब्राउनलाई आउट गरी यो साझेदारी तोडेका थिए, जतिखेर सुदूरपश्चिमको स्कोर १ सय ८ रन थियो । ब्राउनले ३५ बल खेल्दै ६ चौका र ५ छक्कासहित ६८ रन बनाए । विनोदले ४२ बल खेल्दै ६ चौकासहित ४३ रन बनाए । ब्राउन र विनोदको बीचमा क्रिस लिन १३ बलमा ३१ र कप्तान दीपेन्द्रसिंह ऐरी १० बलमा १३ रन बनाई आउट भएका थिए । लिनले ४ चौका र २ छक्का तथा दीपेन्द्रले समान १ चौका र १ छक्का प्रहार गरे ।

काठमान्डु गोर्खाजविरुद्ध आक्रामक ब्याटिङ गरेका हरमित सिंह ६ बलमा ४ रन, स्कट कुग्लेइन ८ र आरिफ शून्यमा आउट भए । पोखरा निसमले ४ ओभरमा ४७ रन खर्चेर ३ तथा डाउथवेटले ४ ओभरमा २४, आकाश चन्दले ४ ओभरमा ४३ रन खर्चेर २–२ विकेट लिए ।

प्रकाशित मिति: शनिबार, मंसिर ६, २०८२  ०७:१३
प्रतिक्रिया दिनुहोस्