रोल्पा, जेठ १७। रुन्टीगढी गाउँपालिकाले राष्ट्रसेवक कर्मचारी तथा जनप्रतिनिधिहरूको क्षमता विकास तथा कार्यसम्पादनलाई थप प्रभावकारी बनाउने उद्देश्यले दुईदिने क्षमता अभिवृद्धि कार्यक्रम सुरु गरेको छ।
गाउँपालिकाको आयोजनामा जेठ १७ र १८ गते सञ्चालन हुने उक्त कार्यक्रममा जनप्रतिनिधि तथा कर्मचारीहरूको सहभागिता रहेको छ। कार्यक्रममार्फत सुशासन प्रवर्द्धन, सेवा प्रवाहमा प्रभावकारिता, संस्थागत क्षमता विकास तथा जनप्रतिनिधि र कर्मचारीबीचको समन्वयलाई थप सुदृढ बनाउने विषयमा छलफल तथा प्रशिक्षण प्रदान गरिने अपेक्षा गरिएको छ।

स्थानीय तहबाट प्रदान गरिने सेवाको गुणस्तर अभिवृद्धि गर्न जनप्रतिनिधि र कर्मचारीको क्षमता विकास आवश्यक रहेको भन्दै गाउँपालिकाले यस्ता कार्यक्रमलाई निरन्तरता दिने जनाएको छ।

दुई दिनसम्म सञ्चालन हुने कार्यक्रमले सहभागीहरूको ज्ञान, सीप र कार्यक्षमता वृद्धि गर्न सहयोग पुग्ने विश्वास गरिएको छ।