काठमाडौं,३० असोज - आज देशका हिमाली केही स्थानमा वर्षा तथा हिमपातको सम्भावना रहेको छ। गण्डकी र लुम्बिनी प्रदेशका पहाडी क्षेत्रमा मेघगर्जन र चट्याङसहित मध्यमसम्मको वर्षा हुन सक्ने जल तथा मौसम पूर्वानुमान महाशाखाले जनाएको छ।
 
महाशाखाका अनुसार देशका बाँकी पहाडी भूभागका एक–दुई स्थानमा पनि वर्षा हुन सक्ने सम्भावना छ। तराईका अधिकांश स्थानमा भने मौसम मुख्यतया सफा रहने अनुमान गरिएको छ। रातिको समयमा तराईका केही स्थानमा हुस्सु तथा कुहिरो लाग्न सक्ने महाशाखाले जनाएको छ।

पछिल्लो १२ घण्टामा गण्डकी र लुम्बिनी प्रदेशका केही स्थानमा छिटपुट वर्षा भएको छ। देशका विभिन्न भागमा बादल लाग्ने गरे पनि काठमाडौं उपत्यकासहित अधिकांश स्थानको मौसम सफा रहेको छ। दिउँसोको समयमा धेरै ठाउँमा घाम लाग्ने गरेको छ।

यस वर्षको मनसुन बाहिरिसकेको भए पनि स्थानीय तथा पश्चिमी वायुको प्रभावका कारण केही स्थानमा वर्षा हुन सक्ने सम्भावना अझै रहेको महाशाखाले स्पष्ट पारेको छ।

त्यसैले पहाडी क्षेत्रमा यात्रा गर्ने तथा खुला स्थानमा काम गर्नेहरूले मेघगर्जन र चट्याङको सम्भावनालाई ध्यानमा राख्दै आवश्यक सतर्कता अपनाउनुपर्ने देखिन्छ।